Хүн ам, орон сууцны тооллогыг энэ оны арван нэгдүгээр сарын 11-17-нд улс орон даяар зохион байгуулах болсон. Хүн ам, орон сууцны тооллого явуулахдаа иргэдээс бичиг баримт шаардахгүй. Харин тухайн иргэн өөрийн оршин сууж байгаа газрын засаг захиргааныхаа нэгжид бүртгэлгүй бол тооллогоос өмнө бүртгүүлэх, шинээр төрсөн хүүхэд гэрчилгээ авах зэрэг иргэнийхээ хуулиар хүлээсэн үүргээ биелүүлсэн байхад л болно.

Гадаадад хууль ёсоор амьдарч байгаа хүмүүсийг Консулын газар нь тоолох ба гадаадад хууль бусаар амьдарч байгаа (зургаан сараас дээш хугацаагаар) хүмүүсийг Монголд байгаа ар гэрийнхнээс нь асууж тоолохоор болно. Ингэхдээ тухайн хүний хамт амьдарч байсан өрхийн гишүүнээс, эсвэл тэр өрх гэр бүлээрээ явсан бол нөхрийг нь нөхрийн талын хамгийн ахмад гишүүн, эхнэр, хүүхдийг нь эхнэрийн талын хамгийн ахмад хүн тоолуулна. Харин оюутан, сурагчдыг хаана байгаа газарт нь байнга оршин суугчаар бүртгэж тооллогод хамруулна. Тооллогын нэгдсэн удирдамжийн талаар та бүхэндээ жич мэдээлэх болно.

Вена дахь Элчин Сайдын Яам

<<БУЦАХ